The Unbroken Reverie

"You better watch out... you better not cry! You better not pout; I'm telling you why... Santa Claus is coming, to town!" - Sa araw ng Pasko. sino nga ba talaga ang talagang dapat nating pagka-abangabangan? Sino ba siya, na tunay na makakapag-pawala ng ating kalungkutan at makakapag-bigay ligaya sa atin? - Siya si Hesus, ang Kristo... nakalimutan mo na ba?

Sa tuwing sasapit ang kapaskuhan, dumarami ang ating pingkakaabalahan; pagbibigay, paghahanda, pagpaplano, pamimili, pamamasyal, pagpapahinga... na sa dami ay nakakalimutan narin natin ang tunay na diwa ng Pasko. Natanong mo na ba sa iyong sarili, kung bakit tayo kailangang mamigay ng regalo sa tuwing sasapit ang Pasko? Ano ba ang kahalagahan nito? Ano ba ang ibig sabihin ng Pasko?

Isa ako at ang aking pamilya sa mga sumusunod sa mga tradisyon tuwing Pasko, tradisyon na nga kasi ito. Namimili ako ng mga regalo para sa aking mama at papa, kuya, at mga pinsan (minsan pati sa teachers at classmates ko). Binabalutan ko pa ang mga ito ng magagarang recycled gift wrappers na mabibili sa mall at kuminsan ay may ribbon pa; pag tinamad, sa mall nalang ng pinagbilihanan ko papabalutan ang mga ito. Ganun din naman ang mama at papa ko sa paghahanda ng regalo sa kanilang mga inaanak na inaasahang dumarating sa ika-25 ng Disyembre; dagsaan ang mga magugulo, makukulit at maliliit na bata sa amin; mayroon din namang matatanda. (trivia: ang mama ko ay may 46 na inaanak sa binyag at 6 sa kasal; ang papa ko naman ay mayroong 23 sa binyag at 4 sa kasal). Sa dami ng bisitang dumarating, inihahanda din namin ang mga dekorasyon na sa tuwing dalawang taon ay parating bago. Ganun naging kamagastos ang aming Pasko.

Tungkol naman sa tradisyong talaga namang kinaiinisan ko, ang Santa Klaws! Ang pinakamalaking kasinungalingang dumarating at naghahasik ng lagim tuwing Pasko. Ang mamang may napakalaking tiyan kaiinom ng Coke at Beer. Una sa lahat, marami na ang napaniniwala na alam ni Santa Klaws ang lahat (all knowing), "he knows if you've been bad or good"; na siya ay may kapangyarihan (all powerful), "he rewards the good and punishes the bad"; nandoon siya kahit saan (fills all space), "he delivers all his present in one night"; at ang lahat ng mga ito ay kasinungalingan, "if the devil is the father of lies and Santa is based on lies, who is the father of Santa?", dahil ang Diyos lamang ang may alam, may kapangyarihan, at naroroon sa lahat (omniscient, omnipotent, omnipresent).

Hindi masama ang pamimigay ng regalo lalo na at isa ito sa pinakamadaling bagay na gawin upang ipakita ang ating pagmamahal sa kapwa; gaya ni Hesus na ibinigay ang kanyang buong sarili sa atin upang tayo ay maligtas. Ngunit ang Kapaskuhan ay hindi parating tungkol sa pagbibigay, pagtanggap ng mga regalo at paggastos ng malalaking pera para sa mga dekorasyon. Ang Pasko ay lalong hindi tungkol kay Santa Klaws. Yun ang dapat natin maunawaan.

Ang pasko ay tungkol kay Kristo, ang pinakamalaking regalong naibigay at atin nang natanggap mula sa Diyos. Ang pagdiriwang ng kapaskuhan ay pag-alaala sa regalong ibinigay sa atin ng Diyos dalawang-libu't-pitong taon na ang nakakalipas. Ngayong Pasko, ating tanggapin ang regalo o biyaya na buhay na walang hanggan; bagay na nabili na Niya para sa atin, binalot ng buong pagmamahal, at inihain sa pamamagitan ng Krus.

Ipagdiwang natin sa piling ng ating pamilya, mga kaibigan at iba pang mga mahal sa buhay ang pagbaba ni Kristo mula sa langit upang maregaluhan tayo ng ating kaligtasan. Nawa ay magkaroon tayo ng isang maligaya at makabuluhang pagdiriwang sa darating na Pasko kasama ni Kristo! Meri Krismas!